Ish-deputetja e PDK-së, Xhevahire Izmaku, sot ka zyrtarizuar aderimin e saj në NISMA-n e Fatmir Limajt.
Aderimin e Izmakut, Limaj e cilësoi si lajm të jashtëzakonshëm për partinë e tij dhe aktivistët e saj, pasi tha se NISMA-s, nga sot iu shtua një profesoreshë e Universitetit, poete e humaniste.
Kryetari i Nismës Socialdemokrate, Fatmir Limaj ka thënë se sot këtij subjekti po i bashkohet një grua, profesoreshë e Universitetit, një poete, anëtare e Shoqatës së Shkrimtarëve të Kosovës dhe aktiviste e hershme, humaniste, Xhevahire Izmaku.
“Kemi një lajm të jashtëzakonshëm, sot për NISMËN për aktivistët tanë, dashamirët e miqtë e NISMA, sot NISM-ës po i bashkohet një grua, profesoreshë e Universitetit, një poete, anëtare e Shoqatës së Shkrimtarëve të Kosovës dhe aktiviste e hershme, humaniste, Xhevahire Izmaku”.
“Unë kam pas fatin që të punoj shumë me këtë zonjë të nderuar sidomos në parlament e qeveri. Falë saj në një kohë kur patëm nisur rindërtimin e Kosovës për ta nxjerrur Kosovën nga balta, profesoresha e ka dhënë një kontribut të jashtëzakonshëm si detyrë që e ka pasur edhe në zonën e Vushtrrisë dhe Mitrovicës gjatë viteve 2008-2010”, ka thënë Limaj.
Ai ka shtuar se nuk e kanë ndryshuar pasionin për ndërtimin e vendit dhe se e ruajnë fuqishëm atë ide për ta shtyrë më tutje.
Ndërsa e sapo aderuara në NISMA Socialdemokrate, Xhevahire Izmaku ka thënë se po e rifillon aktivitetin e saj politik aty ku e ka lënë dhe e ka filluar para 25 vitesh.
“Unë po ndihem shumë e vlerësuar, unë vetëm po e rifilloj aktivitetin tim politik aty ku e kam lënë dhe e kam filluar para 25 vitesh. Ne ishim bashkë në nismat politike, në organizimet politike që kishte të bënte me një koncept politik që lidh një ADN të përbashkët me të cilën sot po e vazhdoj aktivitetin politik.
“Do ta përdor energjinë time, energjinë e akumuluar dhe potencialin profesional dhe politik që kam për ta fuqizuar NISMËN Socialdemokrate. Politika Socialdemokrate kanë qenë edhe angazhimi im si deputete”, ka thënë ajo./Ekonomiaonline
