Kryetari i Lidhjes Demokratike të Kosovës, Lumir Abdixhiku, nuk e ka takuar Presidentin e Shqipërisë, Bajram Begajn në vizitën e tij të parë zyrtare në Kosovë.
Kjo vetëm pse takimi nuk është paraparë të jetë në zyrën e partisë së Abdixhikut, por në ambientin e Kuvendit.
“Lidhja Demokratike e Kosovës shprehë keqardhje për mosrealizimin e takimit zyrtar me Presidentin e ri të Shqipërisë, shkëlqesinë e tij Bajram Begaj; me rastin e vizitës së tij të parë në Kosovë. Për dallim nga krerët institucional paraprak të Shqipërisë, Presidentët e shkuar, Kryeministrin e tanishëm, e të tjerë kryeministra paraprak, Presidenti Begaj ka refuzuar të takojë LDK-në në selinë qëndrore të saj”, thuhet në reagimin e Lidhjes Demokratike të Kosovës, shkruan Gazeta Insajderi.
“LDK ka selinë e vet dhe ajo mbetet e hapur për çdo zyrtar të shtetit shqiptar – siç ka qenë përherë”.
Pavarësisht se partia e tretë në vend, e ka selinë tek Qafa në Prishtinë, prijësi i saj ka zgjedhur që disa nga liderët tjerë të Ballkanit të mos i takojë aty.
Siç ka veprua me Presidentin e Malit të Zi, Milo Gjukanoviqin, të cilin e ka pritur në korridorin e hotelit luksoz, që gjendet në qendër të Prishtinës.
“Sot, me bashkëpunëtorë, takuam Presidentin e Malit të Zi, Milo Gjukanoviq. Biseduam për të ardhmen e dy shteteve tona dhe perspektivën euro-atlantike që Kosova dhe Mali i zi si shtete fqinje kanë”, thuhet në njoftimin e 19 majit, teksa shihen edhe fotografitë nga takimi, shkruan Gazeta Insajderi.
Jo larg hotelit ku e takoi Gjukanoviqin, një muaj më pas më 20 qershor, i pari i LDK-së e takoi edhe Kryeministrin shqiptar, Edi Rama.
“Kafen e mëngjesit e pimë bashkë në Prishtinë; afër Sheshit Skenderbeu. Kosova dhe Shqipëria kanë të ardhme të mirë kur trajtojnë hapur e afër çdo temë e rrugëtim”, shkruante Ambixhiku mbi fotografinë e shpërndarë, transmeton Gazeta Insajderi.
