Këshilli i Prindërve të shkollës “Faik Konica” në Prishtinë, ka protestuar para kësaj shkolle duke kërkuar hapjen e shkollave për nxënësit.
Këshilli i Prindërve të shkollës “Faik Konica” në Prishtinë, bashkë me disa nxënës të kësaj shkolle, kanë protestuar në lidhje me grevën e gjithmbarshme që po mbahet në sektorin e arsimit.
Prindërit kanë kërkuar që sa më shpejt të hapen shkollat në mënyrë që të fillojë mësimi normalisht për fëmijët e tyre.
Një nga ta, kë kërkuar nga Qeveria e Kosovës dhe Sindikata e Arsimit, ta gjejnë një zgjidhje dhe nxënësit të kthehen në shkolla.
“Nuk kemi kundër mësimdhënës, qëllimi është që të fillojë mësimi, t’i bëjmë me dijë që ne prindërit nuk mund të rrimë duarkryq në mes të kësaj katrahure të tyre, duke fillu këtu me lutje për mësimdhënësit pastaj me hapa të tjerë për qeverinë dhe SBAShK-ut, që të bëjnë një zgjidhje dhe fëmijët të kthehen në shkollë, është java e katërt dhe kjo është e patolerushme. Nuk kërkojmë fajtor, duam zgjidhje”, ka thënë njëri nga prindërit.
Për grevën në arsim, një nga protestueset e ka fajësuar SBAShK-un.
“Një mujë ditë pa shkolla, as lufta nuk i ka ndalë, as një rrezik si ka ndalë, e ju në paqe pa shkolla. Turp për sindikata”, ka thënë ajo.
Kurse Remzi Kica, i cili kishte qenë profesor në të kaluarën tash në pension, ka thënë se me dëshirë do të kthehej të jepte përsëri mësim, vetëm që nxënësit të kthehen në shkolla.
Meqë vetë i përkas profesionit të tillë iu kisha lutur çdo mësuesi e arsimtari, për hir të fëmijëve, t’i vendosim pikë kësaj gjëje… Me dëshirë do kthehesha të jepja Fizikë përsëri”, ka thënë Kica.
Grevat e sindikatave kanë filluar që nga data 25 gusht e këtij viti dhe janë duke vazhduar ende. Kërkesë kryesore e tyre është shtesa prej 100 eurosh, deri në miratimin e Ligjit të Pagave, i cili tashmë është në konsultim publik./Prishtinapress/
