Kryediplomatja belge Hadja Lahbib po qëndron në Kosovë.
Ajo pas takimit që pati me kryediplomaten kosovare Donika Gërvalla, ka takuar edhe të paren e shtetit Vjosa Osmani.
Për këtë takim kanë njoftuar nga zyra e presidentes Osmani, të cilët njëherit e kanë falënderuar ministren belge që shteti i saj jep mbështetjen për Kosovën.
Osmani e ka falënderuar shtetin e Belgjikës të cilët kanë vendosur të ngrisin marëdhënjet me Kosovën në nivel më të lartë, pra duke hapur ambasadë në Prishtinë.
Nga presidenca njoftuan se kryediplomaten belge e kanë njoftuar edhe me situatën e sigurisë në vend, veçmas për sulmin terrorist të 24 shtatorit.
Njoftimi nga presidenca:
Presidentja Osmani priti në takim ministren e Punëve të Jashtme të Mbretërisë së Belgjikës, Hadja Lahbib
Presidentja e Republikës së Kosovës, Vjosa Osmani ka pritur në takim ministren e Punëve të Jashtme të Mbretërisë së Belgjikës, Hadja Lahbib.
Në këtë takim, Presidentja Osmani falënderoi Belgjikën për mbështetjen për integrimin e Kosovës në Bashkimin Evropian, si dhe mbështetjen e ofruar për anëtarësim në Këshillin e Evropës e në procesin e liberalizimit të vizave.
Gjithashtu, Presidentja Osmani përgëzoi shtetin e Belgjikës për ngritjen e nivelit diplomatik të marrëdhënieve ndërshtetërore me hapjen e Ambasadës në Prishtinë.
Sipas Presidentes Osmani, Kosova është e interesuar për rritjen e bashkëpunimit dypalësh, veçanërisht në fushën e ekonomisë, tregtisë dhe investimeve, si dhe marrëveshjen për bashkëpunim në fushat e sigurisë dhe mbrojtjes.
Presidentja Osmani ka theksuar se mërgata e Kosovës në Belgjikë luan një rol të rëndësishëm në nxitjen e marrëdhënieve ndërmjet dy vendeve.
Në takim, Presidentja Osmani e ka informuar ministren Lahbib edhe për zhvillimet e fundit politike dhe të sigurisë në Kosovë, posaçërisht në lidhje me agresionin e 24 shtatorit të Serbisë ndaj Kosovës dhe nevojën e adresimit të përgjegjësisë së saj për destabilizimin e Kosovës dhe rajonit.
Sipas Presidentes Osmani, Kosova është një vend modern evropian, demokratik dhe shumetnik që aspiron të bëhet anëtare e plotë e Bashkimit Evropian dhe NATO-s, si dhe e organizatave të tjera ndërkombëtare.
Në këtë kontekst, Presidentja Osmani tha se meqë Belgjika e merr presidencën e BE-së më 1 janar 2024, ndaj Kosova është e interesuar të punojë sa më afër me Presidencën belge për të siguruar progres konkret në procesin e integrimit të Kosovës në BE.
