Shkalla globale e papunësisë do të rritet në vitin 2024, sipas Organizatës Ndërkombëtare të Punës (ILO), e cila është e shqetësuar për produktivitetin, përkeqësimin e pabarazisë dhe inflacionin duke prekur të ardhurat e disponueshme.
Shkalla globale e papunësisë, nga 5.3% në 2022, ra në 5.1% në 2023, por në vitin 2024 dy milionë punëtorë shtesë pritet të kërkojnë punë, duke e rritur shkallën në 5.2%, vlerësoi ILO në raportin e saj mbi tendencat globale të punësimit dhe perspektiva sociale për vitin 2024.
Agjencia e OKB-së kujton se rimëkëmbja ekonomike pas pandemisë Covid-19 është ngadalësuar në sfondin e tensioneve gjeopolitike dhe inflacionit të vazhdueshëm që ka çuar në një rritje të normave të interesit nga bankat qendrore.
Rritja globale në 2023 ishte ende pak më e lartë se parashikimi dhe tregjet e punës treguan elasticitet të papritur, tha ILO. Por pagat reale ranë në shumicën e vendeve të Grupit 20 (G20), pasi rritja e pagave nuk eci me inflacionin, vuri në dukje agjencia.
Raporti vlerëson tendencat më të fundit të tregut të punës, duke përfshirë papunësinë, krijimin e vendeve të punës, pjesëmarrjen në fuqinë punëtore dhe orët e punës, dhe i lidh ato me rezultatet e tyre sociale. Raporti zbulon se disa të dhëna, kryesisht mbi rritjen dhe papunësinë, janë “inkurajuese”, tha drejtori i përgjithshëm i ILO-s, Gilbert Ungbo.
Por “një analizë më e thelluar zbulon se pabarazitë në tregun e punës po thellohen,” shtoi ai. “Ka filluar të duket sikur këto disbalanca nuk lidhen vetëm me rimëkëmbjen nga pandemia, por janë strukturore”, tha ai.
