Në përvjetorin e pavarësisë së Shteteve të Bashkuara të Amerikës, më 4 korrik të vitit 2019 në Prishtinë është bërë përurimi i ndërtesës së re të ambasadës amerikane, e cila konsiderohet manifestim fizik i një partneriteti të qëndrueshëm në mes të SHBA-së dhe Kosovës.
Ky objekt gjigant i ambasadës amerikane në Prishtinë, që është edhe më i madhi në Ballkan, u projektua nga David Brody Bond Architects & Planners.
Lidhur me këtë objekt, Zyra e Operacioneve për Ndërtesat Jashtë SHBA-së, është shpërblyer me çmimin “Engineering Excellence Awards” nga Këshilli Amerikan i Kompanive Inxhinierike.
“Ambasada e Shteteve të Bashkuara në Kosovë ka fituar çmimin nga Këshilli Amerikan i Kompanive Inxhinierike të Virxhinias për vitin 2020”, thuhet në njoftimin e Zyrës së Operacioneve për Ndërtesat Jashtë SHBA-së.
Vendi se ku është ndërtuar ambasada ishte dhuruar nga Komuna e Prishtinës me të drejtë shfrytëzimi për 99 vite.
