Kryetari i komunës së Podujevës, Shpejtim Bulliqi dhe drejtori i Shërbimit Spitalor, Klinik Universitar i Kosovës, Elvir Azizi, kanë nënshkruar kontratë për shfrytëzimin afatgjatë të objektit që është i dedikuar për Ploiklinikë Specialisitike.
Në bazë të kontratës, objekti që është pronë e komunës së Podujevës, do t’i jepet ShSKUK-së në shfrytëzim afatgjatë pa pagesë.
“Ndërkohë, SHSKUK-ja do të bëjë rekrutimin e stafit të mesëm dhe blerjen e disa pajisjeve të nevojshme, për të cilat tashmë i kanë nisur procedurat e prokurimit”.
“Pas nënshkrimit të marrëveshjes-kontratës, Kryetari Bulliqi u shpreh i lumtur që qytetarëve të Podujevës shumë shpejt do t’u ofrohen shërbime specialistike në komunën e tyre, për të cilat deri tash janë detyruar të udhëtojnë në Prishtinë”, thuhet në njoftim.
Pjesë e ceremonisë së nënshkrimit të kontratës ishin ministri i Shëndetësisë, Arben Vitia dhe drejtoresha e Shëndetësisë dhe Mirëqenies Sociale e Podujevës, Adelina Stublla.
