Presidenti Recep Tayyip Erdogan ka theksuar rëndësinë e unitetit palestinez, teksa zhvilloi diskutime me shefin e Byrosë Politike të Hamasit, Ismail Haniyeh, të shtunën në Stamboll.
Sipas mediave turke, takimi me dyer të mbyllura u zhvillua në zyrën e Dolmabahçes, me pjesëmarrjen e delegacioneve nga Turqia dhe Hamasi.
Siç thuhet më tej, diskutimet u fokusuan në sulmet izraelite kundër palestinezëve në Gaza dhe territoret palestineze, dërgimin e ndihmave humanitare të mjaftueshme dhe të pandërprera në Gaza, si dhe një paqe të drejtë dhe të qëndrueshme në rajon.
Presidenti Erdogan tha se është jetike që palestinezët të veprojnë në unitet, gjë që ai tha se do të ishte përgjigja më e fortë ndaj Izraelit.
Ai tha gjithashtu se e vërteta për palestinezët dhe kauzën e tyre të drejtë duhet t’i transmetohet më shumë komunitetit global kundër Izraelit dhe propagandës së tij të rreme.
“Është jetike që palestinezët të veprojnë me unitet në këtë proces. Përgjigja më e fortë ndaj Izraelit dhe rruga drejt fitores qëndron në unitet dhe integritet”, citohet të ketë thënë ai.
Duke vënë në dukje se Turqia vazhdon të përpiqet të tërheqë vëmendjen e komunitetit global ndaj shtypjes së palestinezëve, Erdogan ka thënë se Ankaraja gjithashtu kërkon një armëpushim të menjëhershëm dhe të përhershëm në Gaza.
Erdogan ka kritikuar ashpër Izraelin dhe ka akuzuar kryeministrin izraelit Benjamin Netanyahu për kryerjen e një “masakre” që kur ky i fundit filloi një ofensivë vdekjeprurëse ushtarake në Gaza pas një sulmi ndërkufitar të 7 tetorit të udhëhequr nga grupi palestinez i rezistencës Hamas, në të cilin ishin vrarë rreth 1200 izraelitë.
Duke e krahasuar luftën e Hamasit me Luftën e Pavarësisë së Turqisë 100 vjet më parë, Erdogan tha: “Ne e dimë mirë koston e të theksuarit të kësaj, por bota duhet ta dijë të vërtetën”.
Duke theksuar se askush nuk mund të vërë në dyshim ndjeshmërinë e Turqisë ndaj çështjes palestineze, Erdogan tha se kauza palestineze i dha jetës së tij kuptim të ri.
“Unë do të luftoj për kauzën palestineze dhe do të jem zëri i popullit të shtypur palestinez edhe nëse do të mbetem vetëm”, deklaroi ai.
Siç thekson më tej mediumi turk, grupi i rezistencës palestineze Hamas i mirëpriti komentet e Erdoganit.
Qeveria e Erdoganit mban lidhje me Hamasin, i cili sundon Rripin e Gazës.
Dhe ndryshe nga disa vende evropiane dhe Shtetet e Bashkuara, Turqia nuk e klasifikon Hamasin si organizatë terroriste.
Ndërkohë të mërkurën, ministri i Jashtëm turk Hakan Fidan u takua gjithashtu me Haniyeh në Doha për të diskutuar konfliktin e fundit në Gaza, sipas burimeve diplomatike.
