Duke marrë shkas nga ngjarjet e fundit kriminale në Shqipëri, Policia e Shtetit do të rrisë vigjilencën gjatë festave të fundvitit.
Ministri i Brendshëm, Taulant Balla, thotë se kjo periudhë shfrytëzohet nga elementët kriminalë.
“Policia e Shtetit do të rrisë vigjilencën gjatë festave të fundvitit, ndërsa elementë të caktuar kriminalë tentojnë ta shfrytëzojnë këtë periudhë të vitit për veprimtaritë e tyre kriminale kundër pronës dhe personit”, shprehet Balla.
Ministri i Brendshëm foli edhe për tentativën e grabitjes në fshatin Prush të Tiranës dhe grabitjen në sheshin “Skënderbej” ndaj dy të rinjve në orët e para të mëngjesit, ku njëri prej autorëve u kap dhe tjetri është në kërkim.
Sa i përket ngjarjes në fshatin Prush, Balla thotë se grupi hetimor është drejt identifikimit të personave të përfshirë.
“Policia e Shtetit ka arrestuar autorin e një grabitje në Tiranë dhe ka ndërhyrë në kohë për të parandaluar një tjetër në fshatin Prush. Gjatë natës së mbrëmshme policia dhe prokuroria kanë avancuar drejt identifikimit dhe arrestimit të personave të përfshirë në këtë ngjarje”, deklaroi Balla.
Në ngjarjen e Prushit ishin të përfshirë 5 persona që tentuan të grabisnin një banesë. Por policia që shkoi menjëherë në vendngjarje, u përball me grabitësit. Këta të fundit hapën zjarr, po kështu edhe policia iu kundërpërgjigj.
Nga të shtënat nuk ka asnjë person të lënduar, por autorët arritën të largoheshin dhe janë në kërkim. Pas përplasjes me policinë, grupi i tyre u nda./tvklan.al
