Nga arratia, Lutfi Dervishi është kthyer direkt në burg. Për të Prokuroria ka kërkuar masën e paraburgimit, derisa Gjykata do të vendosë të enjten për pranimin e kësaj kërkese apo jo.
I dënuar me 8 vjet burgim në rastin Medicus, kur u bë aktvendimi i plotfuqishëm, Dervishi u arratis nga drejtësia, duke mos shkuar në vuajtje të dënimit, raporton KTV.
Ai bashkë me djalin e tij, Arban Dervishi, u arratisen në shkurt të vitit të kaluar. Gjykata Supreme, në fund të 2016-ës, e ka kthyer rastin në rigjykim dhe ka kërkuar shfuqizimin e urdhër-arresteve ndaj tij.
Pasi u arrestua një ditë më parë, të mërkurën Gjykata ia ka caktuar një muaj paraburgim me arsyetimin e rrezikut të ikjes.
Avokati i tij, Valon Hasani e ka quajtur vendimin e jashtëligjshëm sepse ka thënë se ai është arrestuar me urdhër-arrest të pavlefshëm.
Hasani ka mohuar që klienti i tij, urologu Lutfi Dervishi, të ketë qenë duke u fshehur në Serbi, derisa EULEX-i ka konfirmuar se ai është arrestuar në Prishtinë. Në kërkim vazhdon të konsiderohet Arban Dervishi, djali i Lutfi Dervishit.