Një ndërprerje masive e energjisë elektrike ka shkaktuar kaos në Kanë dhe zonën përreth gjatë ditës së fundit të Festivalit të Filmit në Kanë, duke ndërprerë përkohësisht shfaqjet e filmave.
Rreth 160,000 shtëpi në qytetin e Kanës dhe komunat përreth mbetën pa energji elektrike të shtunën, sipas raportimeve të operatorit të energjisë elektrike, RTE.
Policia lokale ka nisur hetimet për një sulm të mundshëm me zjarrvënie, i cili dyshohet të ketë shkaktuar këtë ndërprerje të papritur të energjisë, pasi një nënstacion elektrik mund të ketë pësuar dëmtime të shkaktuara nga zjarr.
Në qytet, dyqanet dhe restorantet u përballën me vështirësi të mëdha gjatë ndërprerjes së energjisë. Laurent Aboukrat, pronar i restorantit “Canne’s Jamin”, tha për agjencinë AFP se frigoriferët e tij ishin të fikur që nga mëngjesi, dhe nëse energjia nuk do të rikthehej shpejt, do të ishte e pamundur të vazhdohej me operimin e restorantit.
“Edhe një orë dhe do t’i hedh të gjitha,” tha ai, duke theksuar vështirësinë për të menaxhuar situatën.
Ndërkohë, producenti australian Darren Vukasinovic e përshkroi situatën si një “krizë,” duke shtuar se “Kani është në një ngadalësim total, nuk ka kafe askund dhe mendoj se qytetit i kanë mbaruar kroasanët, kështu që ky është si një territor krize.”
Dita e shtunë ishte dita e fundit e Festivalit të Filmit në Kanë, me aktoren franceze Juliette Binoche dhe jurinë e saj që do të shpallin fituesin e Palmës së Artë, çmimin më të lartë që jepet në këtë festival.
Policia është duke hetuar mundësinë e një zjarrvënieje të qëllimshme, e cila mund të ketë shkaktuar këtë ndërprerje të madhe.
