Gjykata Themelore në Prizren ka njoftuar se ia ka caktuar 1 muaj paraburgim shtetasit turk M.G. që dyshohet se theri me thikë dy vajzat dhe gruan e tij, e njëra nga vajzat vdiq në vendin e ngjarjes.
Ai dyshohet për veprën penale “Vrasje e rëndë” dhe “Vrasje e rëndë e ngelur në tentativë”.
“Me rastin e caktimit të paraburgimit, Gjykata ka marrë parasysh peshën e rëndë të veprave penale, duke marrë parasysh mënyrën dhe rrethanat në të cilat dyshohen se janë kryer veprat penale, brenda ambientit familjar, dhe duke marrë parasysh vendosmërinë e të pandehurit për të kryer veprat penale, në këtë fazë caktimi i paraburgimit është i domosdoshëm dhe i arsyeshëm. Gjithashtu duke marrë parasysh faktin se i pandehuri është shtetar turk, nuk ka vendbanim të përhershëm në Republikën e Kosovës, caktim i paraburgimit është i domosdoshëm për të siguruar prezencën e tij në procedurën hetimore e cila është në fazën fillestare, dhe me lënien në liri, i pandehuri mund të ipet në arrati me qëllim të shmangies nga institucionet e drejtësitë. Nga të lartcekurat, Gjykata ka ardhur në përfundim se në rastin konkret caktimi i paraburgimit për të pandehurin është oportune dhe e nevojshme, për mbarëvajtjen e procedurës hetimore, sigurimin e prezencën së të pandehurit në procedurë hetimore, parandalimin që i pandehuri të arratiset apo të ndikojë në dëshmitaret dhe provat e rastit.”
