Pas takimit të zhvilluar një ditë më parë mes drejtuesve të FFK-së, të udhëhequr nga presidenti Agim Ademi, dhe përfaqësuesve të klubeve, tashmë është përcaktuar edhe orari i plotë i Albi Mall Superligës për edicionin 2026/27.
Kampionati i ri do të nisë më 15 gusht, ndërsa në garë do të jenë 10 skuadra, të cilat do të zhvillojnë nga 36 ndeshje gjatë sezonit.
Xhiroja e parë sjell menjëherë disa duele që mund të tërheqin vëmendjen e tifozëve. Drita do të përballet me Llapin, ndërsa Prishtina do të jetë nikoqire e Ballkanit.
Në dy përballjet e tjera, Vushtrria luan ndaj Malishevës, ndërsa Drenica përballet me Dukagjinin. Sfida tjetër e javës së parë është ajo mes Feronikelit 74 dhe Gjilanit.
Kështu, që në start, shorti ka rezervuar përballje mes skuadrave që synojnë objektiva të ndryshme – nga lufta për kreun dhe garat evropiane, deri te sigurimi i mbijetesës në elitë.
Xhiroja e parë:
- Drita – Llapi
- Prishtina – Ballkani
- Vushtrria – Malisheva
- Drenica – Dukagjini
- Feronikeli 74 – Gjilani
Edicioni i ri vjen me një përbërje prej 10 skuadrash: Drita, Ballkani, Prishtina, Malisheva, Gjilani, Llapi, Dukagjini, Drenica, Feronikeli 74 dhe Vushtrria.
Me kampionatin që nis në mesin e gushtit, vëmendja tani zhvendoset te përgatitjet e skuadrave dhe përforcimet e fundit para startit të garës.
